Zulmat Ko Zia – Habib Jalib

 

zulmat ko zia sarsar ko saba bande ko khuda kya likhna,
patthar ko guhar divaar ko dar kargas ko huma kya likhna
ik hashr bapa hai ghar ghar mein dam ghuTta hai gumbad-e-be-dar mein
ik shakhs ke haathon muddat se ruswa hai watan duniya-bhar mein
ai deeda-varo is zillat ko qismat ka likha kya likhna
zulmat ko zia sarsar ko saba bande ko khuda kya likhna

ye ahl-e-hashm ye dara-o-jam sab naqsh baraab hain aye hamdam
mitt jaayeinge sab parwarda-e-shab aye ahl-e-wafa reh jaayeinge hum
ho jaañ ka ziyañ par qatil ko maasum-ada kya likhna
zulmat ko zia sarsar ko saba bande ko khuda kya likhna

logon pe hi hum ne jaan vaari k hum ne hi unhi ki gham-khwari
hote hain to hon ye haath qalam shayer na baneinge darbari
iblees-numa insaanoñ ki aye dost sanaa kya likhna
zulmat ko zia sarsar ko saba bande ko khuda kya likhna

haq baat pe koḌe aur zindaan baatil k shikanje mein hai ye jaañ
insaan hain k sahme baithay hain khuñkhaar darinday haiñ raqsaañ
is zulm-o-sitam ko lutf-o-karam is dukh ko dawa kya likhna
zulmat ko zia sarsar ko saba bande ko khuda kya likhna

har shaam yahan sham-e-virañ āseb-zada raste galiyañ
jis shehr ki dhun mein nikle the wo shehr dil-e-barbaad kahañ
sehra ko chaman ban ko gulshan baadal ko rida kya likhna
zulmat ko zia sarsar ko saba bande ko khuda kya likhna

aye mere watan k fankaaro zulmat pe na apna fan vaaro
ye mehl-saraoñ ke baasi qatil haiñ sabhi apne yaaro
virse meiñ hameiñ ye gham hai mila is gham ko naya kya likhna
zulmat ko zia sarsar ko saba bande ko khuda kya likhna

Leave a Reply

Your email address will not be published. Required fields are marked *